ماني وانا الأجدل عطيب الضرايب=في عاير اشبيلي من القوم خمسين
ارد العدود المكظمات العبايب= في صفّ مثناتي مخمّس ورمحين
ماني على ماقيل راعي طلايب=ولا ني مع الصاحب رفيق ٍ بوجهين
ماني من اللي يفتلون المصايب= ولاني من اللي يشقر العود نصفين
ماني من اللي عيشته بالزرايب= ولاني من اللي يجعل القيف قيفين
احب لمّات الخوي والحبايب=واكره دروب التفرقه بين الاثنين
نفخر بذكر الجَدّ صيت ونسايب=ونشره على اللي موقفه بين (قوسين)
مادام راسي له تهب الهبايب=نركز لجزلات المعاني عمودين
اغير قبل اهل القنا والركايب=واكرم رجال المعرفه واقضي الدين
ما هزني هوشات سود النوايب=العرض وافي بصمتة هامة الدين
سوم المراجل بالفعول الذرايب=ماهي غناوي للمراقص وتلحين
نفهم جواب اهل القلوب اللبايب=ونربأ عن المنقود من فعله الشين
اذا دعا المطلق نجي له كتايب=وإذا انتفش جاهل بيلغيه حرفين
ينهب مذاهبنا زمان الغرايب=ويرعا شيمنا مثل رعي ام حدّين
الله واكبر يا زمان العجايب=دست النقا واعطيت للذّل تمكين
شف مسلمين الدين دمهم سحايب=شف يازمن بغداد تبكي فلسطين
شف يازمن فيما جرى وانت غايب=ساقت لنا الدنيا على الوجه كفين
هبت الغضنفر والحصيني قرايب=واسكنت جوف النابغه قلب مسكين
راس الزمن من فعلنا سار شايب=والوقت صابه علّة امراض معدين
دهر الزمن لوطال فالوقت عايب=وش حاجة الدنيا بشبه المصلين
اشغلت بالي يا زمان الغرايب=اليا صفالي يوم عكّرت عشرين
خلّيت مدات الصخيّه عطايب=واجزلت للكف البخيله بقرشين
ليش الزمن خيره على كلّ عايب=واليا طلبته حاجة قال بعدين
رزقي على الله في نهار النشايب=ما ينكتب للعبد ينشاف بالعين